«Ես սպասում էի դժվար խաղի, և առաջին 20 րոպեներին մերոնց մոտ լարվածություն էր զգացվում, բայց առաջին գոլից հետո խաղը փոխվեց: Դժգոհ եմ առաջին խաղակեսից, բայց կարևորը վերջնական արդյունքն է և 3 միավորը»,- այսօր Հայաստան-Մակեդոնիա հանդիպումից հետո այսպես սկսեց մամուլի ասուլիսը Հայաստանի հավաքականի գլխավոր մարզիչ Վարդան Մինասյանը:

Անդրադառնալով ֆուտբոլիստներին՝ Մինասյանն ասաց.
«Մովսիսյանին խաղադաշտում թողեցի, որ վայելի այդ պահերը: Կառլեն Մկրտչյանն ինքը խնդրեց, որ իրեն փոխարինեմ: Կասպարովը 39 աստիճան տաքություն ուներ, բայց մեզ հետ կմեկնի Իռլանդիա: Կենտրոնական պաշտպանների խաղը բավարար չեմ գնահատում՝ չնայած նրանք առաջին անգամ էին իրար հետ խաղում»:

Մինասյանը նշեց նաև, որ խաղեր կլինեն, որ երկու հարձակվողով կխաղանք:


Վերջում Վարդան Մինասյանն ասաց, որ պետք չէ ոգևորվել հաջողությունից. «Խաղից առաջ տղաներին զգուշացրեցի, որ կարևորը մեր բռնած գիծը պահելն է, և պետք չէ շատ ոգևորվել: Հիմա նույնը Իռլանդիայի հետ խաղից առաջ եմ ասելու»:

հղում 1in.am